“Azərbaycan Üzgüçülük Federasiyası ilə əməkdaşlıq etmək çox xoş olacaq”.
İdman.biz xəbər verir ki, bu sözləri Bakıda səfərdə olan Avropa Su İdmanı Növləri Federasiyasının prezidenti Antoniu Silva jurnalistlərə açıqlamasında deyib.
O, Azərbaycan Üzgüçülük Federasiyasının rəhbər şəxsləri, gənclər və idman naziri Fərid Qayıbovla görüşlərin məhsuldar keçdiyini bildirib: “Görüş zamanı bir neçə mövzu müzakirə edildi. AÜF ilə uzunmüddətli əməkdaşlığa qərar verdik. Bu mövzuda çox istəkli və motivasiyalı olduğumu deməliyəm. Həmçinin məşqçilərin təhsilini ən önəmli nüanslardan biri kimi qiymətləndirdik. Nəhayət, görüşdə yaxın gələcəkdə Avropa və dünya səviyyəsində bəzi tədbirlər təşkil etmək üçün bir çox imkanlardan danışdıq. Düşünürəm ki, görüşün əsas mahiyyəti məhz budur. Uğurlu işlər görəcəyimizə inanıram. Ümid edirəm ki, yaxşı nəticələr əldə edəcəyik.
Məqsədimiz su idmanı növlərində nizam-intizamı artırmaq, üzməyi daha yaxşı öyrənə bilmək və suda boğulmağın qarşısını ala bilmək üçün maarifləndirici proqramların sayını artırmaqdır".
O, Azərbaycana ikinci dəfə səfər etdiyini vurğulayıb: "İlk dəfə Azərbaycana 2015-ci ildə Bakıda keçirilmiş Avropa Oyunları zamanı səyahət etmişdim. Bu şəhər heyrətamizdir. Bakının bu illər ərzində nə qədər inkişaf etdiyinin şahidi oldum. Həmin vaxt Azərbaycan milli komandasının üzvləri ilə görüşmək imkanı əldə etmişdim. Onlar çox istedadlı üzgüçülər idilər. Yüksək səviyyədə məşq keçirdilər".
Aytac Sahəd
İdman.biz
