“U-21 yaş qrupunda potensiallı taekvondoçular var”.
Bunu İdman.biz-ə Azərbaycanın taekvondo üzrə U-21 millisinin yeni baş məşqçisi Elnur Amanov deyib.
O, təyinatına münasibət bildirib. Amanovun sözlərinə görə, artıq U-21-də baş məşqçi vəzifəsi vacib olub: “Bu yaş qrupunda indiyə kimi yalnız Avropa çempionatı keçirilirdi. Lakin bu ildən dünya çempionatı da olacaq. Bu səbəbdən federasiya rəhbərliyi məni baş məşqçi, Zahid Məmmədovu isə köməkçi məşqçi təyin etdi. Çalışacağıq ki, idmançılarımızın hazırlığını daha da yaxşılaşdırıb, uğurlu nəticələr qazanaq”.
Təcrübəli mütəxəssis vurğulayıb ki, hazırda əsas prioritet komandanın heyətini formalaşdırmaqdır: “İlkin olaraq U-21-də Azərbaycan çempionatı keçirəcəyik. Bundan sonra komandanın heyətində kimlərin yer alacağı bəlli olacaq. Çünki U-21 elədir ki, həm gənclər, həm də böyüklərdə olan idmançılar bu yaş qrupuna düşür. Yığmanın heyəti müəyyən olunandan sonra isə Avropa və dünya çempionatına hazırlıqlar başlayacaq. Əsas hədəfimiz hər iki mötəbər yarışda medal qazanmaqdır”
Qeyd edək ki, Amanov, eyni zamanda kişilərdən ibarət yığmamızda işini davam etdirəcək.
Aytac Sahəd
İdman.biz
