Azərbaycan Voleybol Federasiyasının (AVF) rəhbərliyi Avropa çempionatında çıxışını başa vuran qadın voleybolçulardan ibarət millimizlə görüşüb.
İdman.biz saytına federasyanın mətbuat xidmətindən verilən məlumata görə, Gənclər və İdman Nazirliyinin Voleybol Mərkəzində baş tutan görüşdə AVF-nin prezidenti Şahin Bağırov, vitse-prezidentlər Faiq Qarayev və Bəhruz Quliyev, baş katib Faiq Orucov, İdarə heyətinin üzvləri, eləcə də yığmamızın hazırda Bakıda olan oyunçuları və texniki heyəti iştirak edib.
Şahin Bağırov voleybolçularımızın Avropa çempionatında arzulanan nəticəni əldə edə bilməsələr də, sonadək mübarizə aparmarlarını xüsusi qeyd edib. O, komanda üzvlərinin uğurlu çıxış üçün əllərindən gələni etdiklərini vurğulayaraq, onlara təşəkkürünü bildirib. Federasiya rəhbəri voleybolçulara ruhdan düşməməyi, bundan sonrakı yarışlara köklənməyi tövsiyə edib.
Ölkədə voleybolun inkişafı istiqamətində həyata keçirilən tədbirlərdən və nəzərdə tutulan planlardan danışan Ş.Bağırov onu da bildirib ki, federasiya həm qız, həm də oğlan voleybolçuların yetişdirilməsi ilə bağlı işlər görür. Artıq bu məqsədlə bir sıra seleksiya xarakterli tədbirlər həyata keçirilib, düşərgələr təşkil edilib. Həmçinin bölgələrdə voleybola marağın artırılması və uşaqların bu idman növünə cəlb edilməsi üçün regional klublar, mərkəzlər yaradılır. Qeyd edilib ki, bütün bu işlərin məqsədi seçilən uşaqların peşəkar voleybolçu kimi yetişdirilməsi və onların gələcəkdə milli komandalarımızın heyətində çıxış etməsidir.
Görüşdə bildirilib ki, bəzi oyunçularımız artıq klub mövsümünə hazırlıq məqsədilə çıxış edəcəkləri kollektivlərin bazasına yollanıblar, bəziləri isə bir müddət sonra öz komandalarına qoşulacaqlar. Federasiya rəhbərliyi həm xarici çempionatlarda, həm də ölkə birinciliyində mübarizə aparacaq voleybolçularımıza ugurlar arzulayıb.
Daha sonra millimizin üzvləri və AVF rəhbərliyi Avropa çempionatındakı çıxışla bağlı fikir mübadiləsi aparılıblar.
İdman.biz
