Komandamız mübariz əhval-ruhiyyədədir.
İdman.biz xəbər verir ki, bunu qadın voleybolçulardan ibarət Azərbaycan millisinin voleybolçusu Anastasiya Mertsalova qurumun mətbuat xidmətinə açıqlamasında deyib.
Bu gün Avropa çempionatında ilk oyuna çıxacaqlarını xatırladan blokçu Çexiya yığmasını yaxşı analiz etdiklərini bildirib: "Biz bu oyuna hələ Sloveniyadakı təlim-məşq toplanışında hazırlaşmağa başladıq və burada, Düsseldorfda video görüntülərlə davam etdik. Çexiyanın heyətində hər bir oyunçunu izləmişik. Rəqibin oyununa qarşı bizə müəyyən tapşırıqlar verilib".
O, qitə çempionatında qarşılarına qoyulan vəzifəni də açıqlayıb: "Əlbəttə ki, məqsəd yalnız qələbədir. Artıq öz bacarıqlarımızı və hazırlıq prosesindəki tapşırıqları tətbiq etmək istəyirik. Sona qədər mübarizə aparmağa hazırıq və səbirsizliklə startı gözləyirik".
Qeyd edək ki, Azərbaycan – Çexiya oyunu Bakı vaxtı ilə saat 22:00-da başlayacaq.
İdman.biz
