“Ölkə rəhbəri İlham Əliyev hər zaman idmana, idmançılara diqqət və qayğı göstərib”.
Bunu İdman.biz-ə Azərbaycan Voleybol Federasiyasının vitse-prezidenti, tanınmış məşqçi Faiq Qarayev deyib.
Millinin baş məşqçisi idmanın inkişafında uzunmüddətli səmərəli fəaliyyətinə görə Azərbaycan Respublikası Prezidentinin fərdi təqaüdünə layiq görülməsinə münasibət bildirib.
Ölkə başçısı İlham Əliyevə təşəkkür edən Qarayev deyib ki, bayram ərəfəsində idmançılara, məşqçilərə və idman mütəxəssislərinə verilən adlar, mükafatlar onun idmana diqqət və qayğısının bariz nümunəsidir: “Dövlət başçısı mənə də Prezidentin fərdi təqaüdünün verilməsi ilə bağlı Sərəncam imzalayıb və buna görə cənab Prezidentə təşəkkürümü bildirirəm. Fürsətdən istifadə edib ölkə başçısını doğum günü münasibətilə təbrik edirəm. Belə gözəl bir gündə idmançılarla görüşmək, onları təbrik etmək böyük stimuldur. Deyə bilərik ki, dünyanın heç bir yerində idmançılara ölkə başçısı tərəfindən bu dərəcədə diqqət yoxdur. Mən bir daha cənab Prezidentə təşəkkür edirəm və bildirmək istəyirəm ki, hər zaman olduğu kimi bundan sonra da voleybolumuzun zirvələrdə olması üçün əlimdən gələni edəcəyəm".
İdman.biz
