Bu gün İngiltərə Premyer Liqasında XIII tur çərçivəsində “Mançester Siti” - “Liverpul” oyunu keçiriləcək.
İdman.biz xəbər verir ki, turun prinsipial matçı həm son illərin rəqabəti baxımından, həm də cari mövsümdə turnir cədvəlindəki vəziyyətə görə önəmli sayılır.
“Mançester Siti” – “Liverpul” rəqəmlərin gözü ilə
Bu komandalar 192 dəfə üz-üzə gəliblər. Oyunların 52-də “şəhərlilər”, 91-də isə mersisaydlılar qalib gəliblər. 49 halda heç-heçə qeydə alınıb.
Premyer Liqada isə bu qarşılaşmaların sayı 52-dir. Matçların 12-də “Mançester Siti”, 21-də “Liverpul” qələbə qazanıb. 19 matçda komandalar hərəyə 1 xal əldə ediblər.
Mançester təmsilçisi rəqibi üzərində ən böyükhesablı qələbəni 1935-ci ildə qazanıb - 6:0. 1995-ci ildə eyni hesab təkrarlanıb. Amma bu dəfə mersisaydlılar üstün olublar.
Komandalar arasındakı oyunlarda ən çox qol isə 1906-cı ildə vurulub. 9 qolun qeydə alındığı görüşdə “Liverpul” 5:4 hesabı ilə qalib gəlib.
Bu matçdan sonra qırıla biləcək rekordlar
Bu qarşılaşmada bir neçə rekord yenilənə bilər. “Liverpul”un 7 oyunluq qələbə seriyasının qırılması gözlənilir. 1937-ci ildən bəri rəqibini liqada ardıcıl 2 dəfə məğlub etməyi bacarmayan “Mançester Siti” 3 xal qazanarsa, 86 illik rekordunu da təkrarlayacaq.
“Şəhərlilər” IX turda “Brayton”u “Etihad”da məğlub etdikdən sonra Premyer Liqada ev oyunlarında ardıcıl 22-ci qələbə ilə ilk rəsmiləşdiriblər. “Liverpul”la qarşılaşmada qələbə Mançester təmsilçisinin evdə ardıcıl 24-cü qalibiyyəti olacaq ki, bununla da onlar 1891-92-ci illərdə “Sanderlend”in bütün yarışlarda qazandığı ev qələbəsi rekorduna şərik çıxacaq.
Komandaların hazırkı vəziyyəti
Turnir cədvəlinə 28 xalla başçılıq edən “Mançester Siti” keçirdiyi 12 matçda 9 qələbə, 1 heç-heçə və 2 məğlubiyyətlə yadda qalıb. Pep Qvardiolanın komandası xal əldə etmədiyi görüşləri səfərdə keçirib.
Onlardan 1 xal geri qalan “Liverpul” isə ikincidir. 8 oyunda qalib gələn Yurgen Kloppun yetirmələri 3 heç-heçə ediblər. Onlar yeganə məğlubiyyətə “Tottenhem”ə (1:2) VII turda üzülüblər.
13 qolla Premyer Liqanın bombardiri “Mançester Siti”nin forvardı Erlinq Holand bu matçı buraxa bilər. Norveç millisində zədələnən futbolçunun oynayıb-oynamayacağı görüş saatında bəlli olacaq. Bundan başqa, ev sahiblərində Natan Ake, Mateus Nunes və Mateo Kovaçiçin də oynaması sual altındadır. Uzun müddətdir zədəli olan Kevin De Bryune, Serxio Qomez və Con Stons bu dueldə də forma geyinməyəcək.
“Liverpul”da isə Tiaqo Alkantara və Endi Robertson zədə səbəbi ilə qarşılaşmanı buraxacaq. Zədələrini sağaldan Mak Alister, İbrahima Konate və Körtis Consu heyətdə yer alması gözlənilir.
Qeyd edək ki, “Mançester Siti” - “Liverpul” görüşü saat 16:30-da start götürəcək.
Emin Ağa
İdman.biz
