“Finala qədər görüşlərim çətin oldu”.
Bunu İdman.bizə Azərbaycanın yunan-Roma güləşi üzrə U-17 millisinin üzvü Turan Daşdəmirov (51 kq) deyib.
Serbiyada təşkil olunan U-17 Avropa çempionatının qızıl medalçısı çıxışını şərh edib. O bildirib ki, rəqibləri heç də zəif olmayıb: “Hər bir görüşüm gərgin mübarizə şəraitində keçdi. Sevinirəm ki, rəqiblərimi bir-bir məğlub edib, finala yüksələ bildim. Əziyyətimiz yerdə qalmadı. Bu çempionat üçün çox çalışmışdıq. Finalda isə erməni rəqibimə 8:0 hesabı ilə qalib gələrək, çempion oldum. Bunun özü mənim üçün qürurverici bir hissdir”.
Qeyd edək ki, Azərbaycan yığması Avropa çempionatında 3 qızıl, 2 gümüş, 4 bürünc olmaqla 9 medal qazanıb. Bununla da millimiz 183 xalla komanda hesabında Avropa çempionu olub.
Banuçiçək Hüseynli
İdman.biz
